Ti DALIGCON Journal:
Naipasngay tapno agpaay a kambas a pakamatmatmatan kadagiti "di maiginggingina a buya" iti gimong, ken agpaay a tangguyob a pakangngegan kadagiti "di maipirpirit a timek" dagiti umili babaen iti pluma ni Mannurat nga Ilokano.
Tarigagayna a pagkaysaen a tiponen dagita a "ladawan" ken "timek" iti namnama nga agbalinda a "dakdakkel" ken "napigpigsa" a pakaanayan a pakadayyegan ti nakem ti mata ken pakapespesan ti konsensia ti lapayag.
Gapuna a panggepna nga ummongen iti maymaysa a lebben (ditoy Daligcon Journal) dagiti sinurat a nangiladawanan ken nangyikkisan ni Mannurat nga Ilokano kadagiti nasao a "buya ken "timek" ti sangkailian; a pakakitaan metten a ti Literatura Ilocana ket literatura a natured, ammona ti umkis ken agtukiad, a literatura met ti sangkailian a maidaddadanes, ken mangipaneknek nga adu met ti annakna a maaw-awagan iti "Mannurat-ti-Ili".
Ngarud, no kayatmo a husgaannakanto dagiti Umili, a sika ket maysa met kadagiti mabilbilang laeng a mannuratda - Mannurat-ti-Ili - umayka ditoy, a nakabitbit iti sinurat a ruknoymo iti Ilim...
1. Silulukat iti amin a Mannurat nga Ilokano.
2. Nasurat iti Iluko ken Filipino (Tagalog) ti maawat a manuskrito (Daniw, Daligconiw, Sarita, Salaysay/Artikulo, Kolum, Damdamag, kdpy).
3. Nasken nga adda pakainaiganna iti ili wenno gimong ti tema ti sinurat.
4.Sapitan ti manuskrito iti kaudian a ladawan ken ababa a biodata ti autor.
5. Adda karbengan ti editor a mangpili ken mangkayas (edit) kadagiti maawat a sinurat. Ken saan a maisubli dagiti manuskrito a di makapatar iti pagrukodan ti editorial.
6. Saan a komersial daytoy a websayt isu nga awan ti manamnama a bayad dagiti maipablaak a gapuanan.
7. Agtalinaed a sibubukel ti copyright kadagiti autor, ken awan karbengan daytoy a websayt a mangaramat iti sabali a pamay-an malaksid laeng ti panangipablaakna ditoy kadagiti maawatna ken dagiti nadawatan-iti-pammalubos a sinurat.
8. Bukod a sungbatan ti autor no ti impatulod ken naipablaak ditoy a gapuananna ket nakopia (kinopia, nga awanan pammakada) manipud iti sinurat ti sabali nga autor.
9. Ipatulod dagiti manuskrito itoy nga adres: [email protected] wenno iti Blk.10 Lot 50, Virgo St., Consuelo Heights, Leonarda, Tuguegarao City, 3500 Cagayan.
