DALIGCONIW:
Maysa a kita/porma ti daniw ni Nelson G. Daligcon, buklen iti 12 balikas a nabingay iti 6 linia: 1 balikas iti 1st linia, 2 balikas iti 2nd linia, 3 balikas iti 3rd linia, 3 balikas iti 4th linia,
2 balikas iti 5th linia, ken 1 balikas iti 6th linia.


aso

napudnoka’t
diosmo – ngem
iti sabali, kumagatka.
ket diak kayat
agtaraken iti
ayup!

dung-aw ti derby winner

siak
ti natadian,
nasugatan ken nangikalang.
ngem ti diosko
ti napalakpakan,
bimmaknang!

mayo 2004

dagiti
dios nagkikinnusit
tapno mabukodandat’ langit
a mangituray daga
a masaksakit,
nakadalit!

surat ti maysa a pinay caregiver

nabanglo
takkit' 'kano
ta filipinas nagbangsit.
agawidakto ngarud dita
inton makapasaruan
ditoy.

tudo

yur-uraydaka
da pagay, nateng –
tapno agbalitok kataltalonan,
tapno agberdet’ kabangkagan.
matnagka ngaminen,
a!

ballaag

no
di kayat
aguray iti awan,
di dumngeg iti
politiko nga
agdandaniw!

black & white board

blackboard:
puraw ti
maris dagiti balikasmo.
whiteboard: nangisit ti
kolor dagiti
balikasna!

burburtia

dios
ti naidarum.
ti nagreklamo, tao.
ti hues, santo.
ti pangngeddeng
pugtuam.

prostituition

idi
makapagparuar nakadakay
pus-ongna, nakaanges nalukay –
nakunana’t bagina: "hay,
agyamanak, addan
pangmatrikula!"

kanta ti naka-exalta
street vendor, binangga ti kotse, natay!
           - maysa a damag iti pagiwarnak

sika,
wara’t dalan,
siam man biagmo,
anting-antingmo sangarumekan laeng
iti ari’t
kalsada!

sinelas

naparsuaka
nga agserbi
iti sirok dapan
ti dios ama?
iti gasat,
agpadata!

ni manang pinay

naglako
iti ling-et,
nagsida iti tuyo.
naglako iti lasag
ket pinagtig-ab
adobo!

isem ti ari ti mayo*

anian
a ganasna
masaadan iti korona
a nasuktan laeng
sangabote a

ginebra!

*panawen ti eleksion

dur-as

naluktan
ti kalsada –
dara ni sawak
ti naibendision, naigasolina
iti kassangpet:
kuliglig!

dakes a ruot

pag-otak
a pag-ot,
ngem agtuboda latta.
ket idi masimronak
binuniagak ida:
politiko!

edsa 2

tao
ken dios
nagkaysa a nangserrek langit.
ngem kalpasanna, tao
naisubli iti
daga!

premio

berso
ni mannaniw:
“naparti ti ansisit
nagtig-ab ti langit.”
daniw nagunggonaan:
bala!

dispensa ti traysi boy

pasensiakan
apo dios
dikan maitulod papanam
bimtak ti pilidko
ngamin, sobrat’
kinadagsenmo!

sariugma ti maysa a potahe

naimas
gayam lateg,
intig-ab ti dios.
ket narugian pannakaanup
dagiti addaan
butillog!

i.t.

agyamanak
apo internet
gapu kenka makadakdakulapko
ti dios, satanas.
wen, bayadanka't
binulan!

bitla ti mayo*

ited
ti talek
tapno pannakapnek maiyeg.
ipaay ti pannakabalin
tapno agbiagkay
amin!


*panawen ti eleksion

langit ti nakaimaruan ti pusok

kamaudiananna,
ti dios
nakainninumak met laeng:
linemmesnak iti arak.
pulotanmi ‘toy
pusok!

kuam, kuak

naipaay
ti parabur.
dua ti nagbingay:
narakab a dakulap,
bassit nga
ima!

aso a nagbarbekiu

sinubuan
ni lukmeg
tarakenna nga aso
iti barbekiu – agpalpalama
a nakakita
napatilmon.

pakaasi ti malakanyang
kadagiti umili a mabisbisinan

makirkiraiden
ti pagbagasan.
tapno malasat gawat,
lipatenyo pay la'ng
nga aronan
dalikan!

pilantropo

nagibunong
iti payless,
rebisco, biogesic, surf…
ti listaan naitulong,
naisabmit iti
simbaan!

asi

ti
agsidsida’t litson,
naasian kadagiti mabisbisinan;
paramanan ida, inkeddengna.
ket naglako’t
payless!

katalonan ti peste

sinekkana
ti pigsana,
inraepna ti ling-etna,
pinadanumanna iti namnama.
ngem arapaap
natungro!

obrero

ling-etna
ti pinampammigatna,
ling-etna ti pinangpangaldawna,
ling-etna ti pinangrabrabiina –
ti impatayna:
bannog!

madyik ti mayo*

sakbayna,
ti katay
nagbalin a kristo.
kalpasanna, ‘di katay
nagbalin a
krus!

*panawen ti eleksion

anak ti obrero

ingngusangosna
ulot’ tuyo,
kinaremkemna dagiti siit;
dinilpatanna ti pinggan.
ti ama
napalua…

jollibee memo

imas
ti taraon
ipatalastas iti telebision.
tapno dagiti awanan,
agkatay nga
agkatay!

mensahe ti langit

kumuttong
ti dios
no tao lumukmeg.
ngarud, ti kusina
bantayan a
nalaing!

price hike

ngimmato
ti payless,
ngimmato ti biogesic,
ngimmato ti lungon.
ti biag
bimmaba!

kalpasan ti amin

insuratmo
iti balota:
mabisinak, saluadannak, taliawennak…
nagtugaw a dios
kastoy subalitna:
asinoka?

grasia

parabur
manipud ngato
a para tao,
idi natnag daga
nagrarangasan ti
aso!

piesta ti langit

nagsaknap
ti rabii,
ket bitbituen nagsasala.
ni daga, piman
a tumangtangad…
aglulua!

kararag ken ni apo asukar

dios
dagiti kape,
isardengmo koman pumangato.
ta pampamedpedmi't bisin
iti agsapa,
nagpaiten!

ling-et ken katay

sangabaldi
a ling-et =
sangabaso a bagas;
sangaparsiak a katay =
sangabariles a
grasia!

troublemaker

ti
dios pinarsuana
bala ken paltog,
nangaramid iti gulo
sa kimmarit:
gubat!

batibat

ngimmina
ti pagay,
limmaka ti birbran,
madawaten ti bayudiesik,
ti lungon
sagbibintingen!

ken ni angkel padi
(*awag dagiti asideg a kabagian daydi Fr. Zacarias G. Agatep – kapidua ti ina ti autor –  a nangidisso iti rosario tapno agiggem iti armalayt ket masalakniban/mailabanna dagiti mairurrurumen a babassit nga umili.)

agingga
a sibibiag
dios a binusormo,
dinto marebba simbaan
a binangon
daram!

arapaap

no
maaddanak armalayt,
sapulek ni mairurrurumen
ket yawatko kenkuana
kapatgan a
sagutko!

tide powder washing instructions: 1. tunawin ang 1½  ang sachet ng ultra tide nature fresh sa ‘low water level’ ng washing machine.
2. labhan ang mga puti ng 10 minuto. 3. ibabad ng 15 minuto ang mga puti
4. para sa pinakamahusay na resulta, labhan ulit (mga puti) ng 5 minuto. Hanguin pagkatapos at labhan na rin dito ang mga dekolor

isu
a ni
puraw nadalus latta!
isu a ni
dekolor narugit
latta!

pulong ni palang*

nagkaroling
dagiti agun-unas
paraangan ti carsumco.**
ti impapaskuan' robina:***
napait a
kape!

*pagsigpat iti unas
**cagayan Robina sugar milling corporation
***akinkukua ti carsumco

disiembre 25 ti anak ti obrero

linuktan
ni buridek
insab-itna a medias.
ket nakangngegak makadayyeg -
makadayyeg a
saibbek!

bilin ti asendero

matikagen
ti talon
iti panagprotestat’ tudo.
padanuman iti dara,
sayang ti
maani!

resayt ni pacio

nalampongak,
awan pagpabarberiak.
ngem di nakaaawat
ti maestrak, kinultakultapannak:
ti ulok
nasugat!

dung-aw

ti
gloria manangngaasi.
pinalusposanna arit' mannanakaw
A binalud umili.
ni gloria
manangngaasi!

ania ngata

no
granadat’ iraepmo
iti talon diosmo –
masingir pay la
ngata ti
abang?

pigad

diak
arapaap agbalin
saka a nadalus.
umanayen a ragsakko
no ridumat’
pagbalinak…

askal

rinukrokdak,
ginerregerretdat’ laslasagko
ket naidissot’ kilawen:
nagpiesta dagiti artek!
ti gita
nalipatanda!

biktima

nagririri
dagiti dios
ket idiay langit
bimtak ti gubat.
ket daga
nabomba!

saludsod ti para litson iti kapehan sa tulay native lechon & restaurant

inaldaw
ti bagik
nga agmanmanteka’t ling-et.
ti bitukak kaanonto
nga agling-et
manteka?

disiembre 25

ti
mesias naipasngay.
ket sagut ar-ari
naidisso iti mansion:
fundador, shabu,
babai!

enero uno

dinengdeng
a marunggay
ti adda’t dulang –
ngem sarabuek latta
daan a
tawen!


kendi

nasam-itka
ngamin. ket
inukisannaka ti kuko,
minulmolannaka ti dila,
ti ngipen
kinaritomnaka!

safeguard

marunrunotka
kadagiti tekkab,
panaglablab buto, kerret…
dung-awmo: kaanonto aggibus
kinadugyot ti
tao?

ultimo remedio

tuleng
ti dios
kadagiti panagdawat pandesal?
idisso ‘ta rosario,
agiggem iti
armalayt!

bao

pagkutimem,
pagkutimem a
pagkutimen iti irik.
inton maspelan, diayaam
iti mainum:
sabidong!

kenka, sipnget

laglagipem:
tunggal panagarim,
dumteng a dumteng
nalabaga a bannawag
a mangbuong
koronam!

sosial dias-tiis

immadu
ti ling-et,
bimmassit ti parabur:
impes ni nakuttong,
bimlad dagiti
dios!

coke

idi
mawaw dios,
binalinsueknaka – akimbabat’ ulom –
sana inarurob daram...
kalpasanna nagbayad:
sensilio!

zonrox

naalian
ti bado
iti rugit bagi…
ket, ay! daram
naipunas kadagiti
mansa!

from saudi with love

agak-akupak
takkit’ arabo…
nalaglag-an laeng, inang
ngem iti maburburisan
iti mismo
pagilianna!

mr. clean

nadalus
manen amerikana –
kalpasan ti pannakaigusugosmo,
pannakairemremmo iti batia –
kalpasan pannakarunot
bagim
!

saludsod ni adobo ken ni kusinero

apay
pay laeng
a lutuen, pabangluennak,
dugyotto met la
a ngiwat
pakaisubuak?

bugguong

dinaklisdaka,
inasinandaka, imburnaydaka!
ngem pangtat’ kararuam:
dakayo nga abusado,
lak-amenyontot’ pammalesko:
bato!

bear brand

naiparsuaka
tapno mangpalukmegka.
ngem apay awanka
iti kusinat’ tao
nga ingget
kuttong?

young's town

naidasarka
iti dulang
lata ti sardinas.
ket nakadilamut tig-ab
nasardinas a
pamilia!


*Dagiti Daligconiw a naipablaak nga awan ti partikular nga autorna ket putar ken kukua ni NELSON G. DALIGCON