JEFFERSON A. APOLONIO
DAGITI BUAYA ITI KARAYAN ANILA
“Agkintayegka no mapanka sadiay Karayan Anila
Nagadu ‘ti buaya, nakatadtadem dagiti saongda
Nagalas dagiti rupada, nagdadakkelan buy-ongda
Awan ik-ikkanda, pati nakuttong piman, lamotenda!”
Yamakmi dagita a balikas kadagiti turista
Amangan no saandan a kayat ti pumasiar ditoy Anila
Ta ken Tio Fil awanen kadaksan no di dagiti buaya
Ayonan ni Manong Pino a kaduami a kumonkontra.
Idi damo nga awan pay ti padasko, namagbagada
Diak kan’ kiburen danum no bilogek Karayan Anila
Ta no limmibeg isunto ti iruruar dagiti buaya
Uray dimo kayat, agbalin kano a laud ti daya.
Salaknibmi kadagiti pirata dagidiay a buaya?
“Balbalatong-surong!” dagus ni Manong Pino nga ipara
Dagitoy kan’ a sal-it ti problemami nga agdadata
Saan koma a maturog ti Anila a nakamata.
Apay ngarud a dimi pugipogen dagidiay a buaya?
Saan kano a dagiti bumario akinrebbeng dayta
Ni kan’ kapitan akimbasol ken dagiti konsehalna
Awan yulogda a linteg, kasla awan ti makitada.
Ngem kunan kapitan, natural resources dagiti buaya
Apay kano ketdin a di taginayonen ti pulida?
Ngem ni Tio Fil di mabior, sabali met ti ipapilitna:
Kinamauyong ti manganak ayup nga awan serbina!
Naman ket tourist attraction daytoy lugarmi nga Anila
Ta nagpintasan ‘diay dissuor kunam no naed ti diosa
Ngem no saan nga ikaso panagadu dagidiay buaya
Mabingay ti bario amangan no makur-itan yaalsa.
Nupay nadlawko sakit-nakem, nakaro a rurod ‘toy dua
Diak natimbeng bagik, bimtak katawak a nakapigpigsa
Diak nga impagarup, ni serioso a Tio Fil kinunana:
Pasokan koma ‘diay puerte BEWARE OF CROCODILE a marka!
