JOBERT MA. PACNIS
Ti Aso A Nangmulagat Iti Mannaniw
Sumsumgiab ti barukong ti daga
A mangay-ayam iti aso
Iti tengnga agkiamkiam a kalsada
Saan a masnop ti taliawenna
Abagatan, amianan, wenno dagiti ubbing
A karinrinnay-aw ti aglako iti pisbol
Iti sango ti ruangan ti elementaria.
Maay-ayatan ngata iti arimbangaw dagitoy?
Wenno agrebrebolusion met ti boksitna?
Wenno dina masungbatan no apay
Nga agingga iti dayta a gundaway adda latta
Iti isipna ti bislak nga inyagyag itay
Ti amona a naggapu iti sugalan?
Dinan sa ket marikna ti kinnit ti init
Ket nagbalin sa payen a tuleng iti banipbip
Ti sumungsungad a motor a pagdaydayyengan
Ti mannaniw.
Naggilap lattan iti mugingna a masapul nga agtaray
Ta addaytan ti bislak a nakalayat
Ngem naladawen. . . nagdappuoren ti lubong.
Idi taliawenna ti bumegbeggang a dalan
Bumangbangon dita ti mannaniw:
Agwingwingiwing iti baet ti ut-ot
A mangkitkita kenkuana a naidasay
Iti sanguana agngatngatingat nga ubing.
Sinubadanna iti mulagat ti wingiwing
Ti padana a mabisin a mannaniw
Sa in-inut a nagkidem. . .
[Bannawag, Mayo 21, 2007]
DARADARA A KAWES
adtoy dagiti daradara a kawes, agur-uray
iti labutab ti sabon ken ingel ti kulada:
ti agsasanggala, agsasallapid a saka
iti tokar a nabuniagan iti malakaniang;
ti masikog a bulsa iti pork barrel
a nainaw iti senado ken kongreso;
ti bukod nga ay-ayam dagiti agsisiim
iti pagaraban iti paraangan ti kapitolio;
ti masumada nga aldaw ken rabii
a pagbibinggawan iti kusapo a lamisaan-munisipio;
ti nalanit a kidkid iti latok
ti nakatapaya, nakapannimid a barangay;
ti bangbangir nga isem ti agit-itlog a kali
iti tangatang ti ekonomia;
ti musmusiigan ti pitakpitak a dapan
nga aglulusiaw a dawa kadagiti kinelleng;
ti anglem dagiti mapasag a namnama
iti gatilio dagiti antukab!
Ama, kadagita bakrangmo, agayus koma ti kalis
nga an-anibmi kadagiti an-annong
(ta saanen a kabaelan ti atang ken panyang!)
[Immuna a naipablaak iti Tawid News Magasin, 23 June 2007]
BEINTE
(ken ni mangmangged)
nalabaga ti maris ti papel ni quezon, saan nga oreyns,
kadagiti mangitagtag-ay kadagiti gemgemda ken kankanayon
a makikinnamat a dapan kadagiti agkiamkiam a lansangan
ti agkamanaw a siudad-- naluto latta ti arapaap iti dakulap
dagiti nagpapatang iti sumilsilap a siled, awanan timek
dagiti pannakabagi, kasapulan ti panangkiraud iti aklo
ti boksit a pagiliglig-isanda ita—makabsog ngamin
ti pannakilanglang iti latok dagiti buaya
nga agud-udaod iti karayan iti likud ti malakaniang.
awanan nagan daytoy a kaasi, wenno pannakabarat ti anges—
panagsilamot laeng iti diro, dinto dumanon iti boksit
ti payapay a tig-ab daytoy maris-dara a papel.
dagiti gemgem, dagiti dapan, maitag-ay-maikuy-adda latta
agingga nga agkankanta iti sintunado dagiti salakan,
ken adda dangadang kadagiti babassit ken dadakkel a bituka
saan a mabubos ti ikkis a maimaldit iti pakasaritaan.
