EDUARDO A. PADAOAN
TI TINAGTAGIURAY A PANAGBALBALIW
Rimmang-ayen, pimmintasen panagbiag ti pagilian
Naprogreson dagiti umili ket awanen mataktakawan
Gimmaget dagiti mangmangged ket produkto agkaiwaran
Awanen ti magunggundawayan, kusto a sueldo maawatdan
Dagiti estambay idi, addadan iti pagmumulaan
Wenno productivo a manufactura, factoria a pagkakitaan
Pimmigsan ti eksportasion kadagiti ikan a makalapan
Ta illegal foreign fishermen agbutengdan.
Dimmur-as payen gross national product ti pagilian
Ta mamimminas aminen a suli dagiti kabambantayan
Pati baybay ken taaw mina ti langis agsasallupang
Dagiti ganggannaet ditoyen inda pagabrodan.
Nanipud rang-ay ti biag, asenso ti pagilian
Kadagiti agkakalaing, madaydayaw a parliamentarian
Ngamin dati a presidential government ket nasukatan
Ngarud nagkaykaysan Kongreso ken Malakanyang.
Damo a pinandayda a linteg nga inda nagtutunosan, nagkaykaysaan
Amin nga agtatakaw, depende iti kaadut’ tinakaw mapukolan
No bassit laeng, mabalin a 'ta kikit wenno tangan
No nawadwad, ay! maputdol saka, mapawad iman.
Nagpintas ti pananakaipagna ti agdama a parliamentari
Napartak pannakaipagna ti linteg, agtuturay basbassit inda panagriri
Ket iti lubong, ti pagilian indan pagdidinnamagan ken ap-apalan
Panaggobierno ni pinoy, kopkopiaenen sabsabali a pagilian.
Ita, adda pampandayenda a linteg a nagsayaat man
No maipasa, agarinton kappia ken talna, maiwalinen ti insureksion:
Libre ti pagpaagas,edukasion ken transportasion, nataengan ken baldado inda agpension
Kadagiti umili, adda pay maited kadakuada binulan a rasion!
Ngem ti asemblia, ita man pay a kapanunotan nabingay
Adun a deliberasion ti naaramid, ngem nagkaysaan awan pay
Ket ngarud, napagnunumuanda idi agangay
Alaen iti binnutosan, mayat ken madi kanawan nga ima itag-ay
Indawat ti speaker, dagiti mayat ken madi imada itag-aydan
Ngem awan met nagresponde, ni maysa a bimmutos, awan!
Kasano koma a dagiti miembro a dati met la a kameng gobierno a naglabasan
Nga adda im-imada a maitayag ket nalpasdan a napukolan?
Binaliwanda ngarud ti pagalagadan, daytayen tinnakderan
Ket timmakder ngarud dagiti mayat ken saan, ngem tie ti bilang
Di met ma-break ti prime minister a dati a pangulo ti gobierno a daan
Ta kasano dua met sakana ti napukolan!
Ni Angkuan, uray la angngangngaw iti pannakasayangna iti dayta a linteg
Ta arapaapna ti agseniorito, dinan kayat agtalon, daytay din a pulos mangged.
Iti kuan nariknana, nasipat ti pispisna:
Mabatbatibat gayam, aldawen ket idiay talon ibabaon ni inangna!