PRODIE GAR. PADIOS


Tedted ti Dara iti Sagumaymay ti Kannag

pisangento latta ti rissik ti bala-ti-lunod
ti makabulsek a sipnget; ket maiburandis
dagiti matmaturog a namnama ken kappia
iti let-ang ti kimmigpal a nadagaang a sardam.
agkaribuso dagiti bunar a makiwar iti aponda
a buntuon dagiti dagensen ken awan naganna
nga aliaw: dungparenda dagiti dalingding
ti agkamkammaulaw a lubong tapno isalakanda
ti bukodda a karadkad—tarayan, maidugmam
ken matulidda man iti katapokan—ayatda laeng
a maadaywanda dagiti gulib ti tadem a mangilap
kadagiti dapanda—isuda nga awanan nalawag
a nagkamtudan ken nagbasolanda—ta unayen
a saem ken ut-ot a kasingin dagiti ikkis ti aligagaw
iti dalukdok ti rumiet ken kapan-awan ken kadapuan
a pagdaliasatanda: mabati dagiti agsagsagaba
a daradara a tugotda—agubbog ti luada a manglayus
iti tanem nga isuda a mismo ti nangkurob: siiimatang
ti law-ang a mangin-inaw iti alibuyong ti kimat...

iti tengnga ti rabii, agulimek ti aglawlaw
ngem idiay salogan ken bakrang ti bantay
mayarikiak ti uni ti tukling a ganggandiong
ket maakas ti nagmanto a langit ket mawaknitan
ti kagabgabur a tanem nga awanan nagan...
iti parbangon, akupen ti nagtagipayak nga angin
ti angtem, aglua metten ti main-inaw a bigat:
nalabaga ti maipusing ken mapursing a linnaaw
iti sagumaymay ti Dios-ti-aluadna a kannag...


(Naipablaak iti BANNAWAG, Enero 15, 2007.)


Eksodus

Dinto agsarday ti ipapanaw dagiti pagaw
Iti bangir a bantay: agukkonda kadagiti dawa
Iti nawadwada, nabakbaknang a hardin ti balitok
Namimpinsanen a pinanawanda ti umokda
Iti sanga ti nalabusan a pinuon iti timmaudanda
A daga: ta uray ti duogan a baliti a nangnutnot
Iti grasia ken bileg ken dara ti kimpetanna
A kayo ti biag, awanen— laylayenen ti panawen
Iti panagpauyo ti dakulap a nangtaya iti arbis—
Ta dagiti anay, agpiestada latta a mangrukrok
Iti ramut ti kaputotan: rippuogen ken tulidenda
Ti adigi nga idi maipatakder, napatedtedan
Iti basi ken natinnagan kadagiti sensilio ti anges…
Abus man pay ta di met agsarday dagiti bagyo
A mangsapsaplit iti agkubkubbo, paragpaganen
A sanga: ti kakaisuna nga uggot iti lulonanna,
Pirpirsay ken adda pay igges ken aplat ken dangaw
A mamagkuribateg— a, ta nakaat-atiddog ti kuko
Ti batibat kadagiti agpatnag: ket makurimesto
Latta met dagiti itlog ti namnama iti umok ti kannaway
Nga iti laeng nalabaga a danum ti waig a maarinsawad.
Iti aringgawis ti allawig, dung-aw ti kanta ni bannatiran
Ta agpamaruten ti dutdotna a kalilibnosan: adda
Sabidong ti angin nga angsenna; nakaro ti ladam
Ti init a tuparenna; narpekanen dagiti eppes a dawa
A pakibulibolanna iti ayat ken grasia: ay, nakaat-atap
Payen kenkuana ti linnaaw— ta ‘yanna kadin daydi
Sanga nga immarakupan dagiti berde a bulong
A nagbitinan bendision ti langit a pedped-wawna?
Maipaddak dagiti rungbeb ken kawweng a dapan
A bumallasiw iti naparkagan ken agrengrengngat
A karayan ti biag: maasut dagiti nasaem nga asug
Iti panangalun-on ti narungsot a gayunggayong
Iti anniniwan ti kinakurapay— agkaem dagiti dakulap
A nagarinsawad iti salakan, ngem in-inuten a naitanem
Iti lansad ti nagtig-ab pay a daga: no dida koma ngamin
Inarapaap ti immallatiw iti narabraber a pagaraban…
A, ngem kamatenda kadi lattan ti angesda a simumulagat?
Bumraang ti law-ang iti pannakaigayang ti kimat iti tuktok
Ti kalbo a turod: kimmali dagiti riwis a rapangrapangan
Ket uray la nagkuripaspas ti naulaw nga angin a nangakup
Iti kimmarandikang a tapok: kellaat ti panagsangit ti langit
A nangsellep iti naparkagan a karabukob ti sangakailap
A daga— pagam-ammuan, nagtulid dagiti bato ken bingkol
A naglugan iti uloulo ti danum: uray la umasuk ti daan
A dalan, ket iti agpatnag, agrikep dagiti rengngat,
Agsarraisi ti waig, manerreg ti karayan: awan-sawir
Ti aggargarakgak nga agus nga umallatiw-agsapul
Iti dakdakkel a kaikarianna nga urat ti danum: sadiay,
Nanamen ken lak-amenna ti makaramutanna a grasia…
Anansata, dinto agsarday ti ipapanaw dagiti pagaw
Iti bangir a bantay: agukkondanto latta kadagiti dawa
Iti nawadwada, nabakbaknang a hardin ti balitok…


(Paset ti koleksion dagiti dandaniw a pinangabak ti autor iti Maikadua a Gunggona, Salip iti Daniw, Komisyon sa Wikang Filipino 2006)


Dandaniw da:

AURELIO S. AGCAOILI / JAIME M. AGPALO, Jr. / JOHMAR R. ALVAREZ /  JEFFERSON A. APOLONIO
 
MARY JANE G. DALIGCON-ARAGON /  ROY V. ARAGON / NELSON G. DALIGCON    
FLORENTINO B. LORENZANA / DANIEL L. NESPEROS / JOBERT MA.  PACNIS / EDUARDO A. PADAOAN    ARIEL S. TABAG