NELSON G. DALIGCON

from america with(out) love

panid 1
naawatko la idi naminsan a kalman dagiti dung-awmo, anti (35 a panid, wen binilangko). ngem kasta met la ti pinanawak, di kadi? maestraka a mangilkilo iti isaang, ma’amka a nalipstikan iti 5-6!

di kadi latta makasapul iti trabaho ni angkel? apay ket ngamin a nagbirok pay la ti maikanatad a bayad ti bannog, ammona la ngaruden a mammartek ti pabrika iti ling-et.
sabagay, (bassit a) gasolinaan laeng (kahera) ti naasian iti sangapulo a sapatosko a pinudpod ti panagsapsapulko idi dita iti pagangsan – siak nga accountancy graduate (a di
makapag-board ta di makabirok trabaho) – ni angkelto la ket ngatan nga addan rekordna?
tattoo ti kinasukir, kunam sa?  

panid 5
saanen a nakakaskasdaaw no naipromot manen ni dalen. kimat a nakastrek, siempre kasta met, a, a pumangato. naasi ngamin ti diosda – kongresman pay la ita?

panid 8
lepleppas la unay ti gapas ngem agpapaisakem ni angkel angkuan ditoy suratmo iti uray igatang laeng iti dua salup a bagas? apay, din pautangan ti pakitaltalonanna? an-anuen la ngaruden ni don dagaan iti kinamalig nga irik? sabagay adut’ tarakenna a bao…

panid 11
saan siguro a nakakaskasdaaw, anti no agpatpatakder ti mansion ‘ta kaarrubatayo. hepe ti b.i.r. isuna, di met?

panid 16
ala, anti, mayoren ni jack? ket no kaeskuelaak la idi iti haiskul. makapagmayor met gayam ti uray dagmel! ay! naglaing idi nga agmarihuana. ay! namber wan pay a manninirip idi –
isu ti nakaammuanmi nga awan ti dutdot ti ilemlemmeng ‘di nagpakamatay a titsermi!

sabagay, mayor ti lilong ni jack, mayor ti amana, mayor ti inana, mayor ti manongna, mayor ti manangna.

nagtaud ngamin iti dios ti pamiliada…

panid 19
lipatemon ‘ta kunkunam a rangtay, ti pannakasemento ‘ta kalsada ken pannakatarimaan ‘ta agub-ubo a klasrummo. nalpasen ti eleksion – inton sumaruno manen a malagip dagita.

panid 23
kaano ngata a masentensiaan ni erap?

panid 27
ala, dikay madanagan iti yar-areng-engyo. uray kaskasano, adda met sagpaminsan a maidulinko iti panagak-akupko iti takki kada sarua ditoy (ammom, anti ania ketdin a bangsit ti rugit ti kano!).
 
pagpiaanna bassit ditoy, nangingngina bassit ti bayad ti ling-et.

panid 34
kitaem la ti biag… dakayo ti pagar-areng-engak idi iti pagpletek a mapan agbasa. ita,
maaramatdak metten a pagdung-awan…

ngem diyo koma kuna a ni daydi bassit a nangtaray iti dapan ti higante a rinabii a
pumaddapaddak iti kalapawda a rutrot ket nalibasannan ti lunod.

panid 39
awan, awan, anti, iti uray ania a suli ti lubong, ti murkat a sapsapulen ni bassit, ken amin
a babassit –  ti murkat a bubuoten iti guardiado a malakanyang – nakabitin latta iti sirok ti dapan ti dios!

panid 43
p.s.
wen gayam, adda adda-sintosintona ditoy a kano (nakarkaro ketdi ti samyutong ni samko).
makaas-asawaen kano la unayen!

ket malaglagipko ngarud ni luzvimindam…#


idi nagwalay ni kristo

“makatektek met ti pananguray iti panungpalan…  bumisitaak man ketdi idiay daga…”
i.

aha, adda gayam unibersidad ni san pablo ditoy! kitaem ti nakidiables (pordios, nagbasol metten ti dilam, apo), imbatik a mangasaba, insikinat’ nangipatakder iti negosio. ngem siguro
napanunotna a nalaklaka a sumrek ti kasaba no nakauniporme a sumrek dagiti adalan. adda waisna (siguro, labanderana ni lumen, apo)! sumrekak man – makikumustaak man kadagiti estudiante ken mimistra. baka ket adu ti problema ken reklamoda – baka makatulongak. ay, pablo, no agkamkamali, masermonan ti agsersermon! ngem agurayka, apay a pengpengdannak ti guardia? ania??? dagiti la nakasapatos ti mabalin, maiparit ti sumrek a nakasandalias?

ii.

daytoy kadin daydi pinanawak nga ili? ania, saan nga ili, siudad itan? ala, ala, wen… anian a rang-ay ken pintasna! nagdadakkel, nagdadaeg dagiti pasdek! nagpintasen ti hardin ti presidensia (city hall, apo)! awan pangaddul dagiti anghel, santa ken santo iti banglo ken pintas ken guapo dagiti adipen dagiti umili (bos tsip dagita, apo). dios ama, langit kad’ pay la dita yanmo – nayakar sa metten dagiti arkitekto ken inhiniero ti taengta ditoy daga? ngem saan siguro… ta agruprupa a demonio daytoy umas-asideg kaniak a naka-9mm. agurayka, agurayka, polis (apo, kunam, apo), apay a tiliwennak? ania, maiparit ti agpalpalama ditoy iliyo, este, siudadyo? bilin dayta ni senador (daytan ti baro nga awag ken ni meyor – senador-to be, apo)? saanak nga agpalpalimos – agurayka, yan ni senador-tubiyo, apay a diak makita ‘diay karuahena (ektiosmi,  sumilsilap  a  pajero,  apo), kayatko  a   makasarita!  agpayso nga agpalpalimosak – ngem saan a ‘ta bintingmot’ dawdawatek: ti yun-unnoyko kenka, yawatmo kaniak dagiti kinamarin a basolmo. ania, trabaho ti trabaho, awan sinnaritaan-innaregluan ditoy? dios ama, dinak kad' baybay-an, tulongannak kadi a manglusot 'itoy santito nga ingget pudno iti sinapataanna!

iii.

saan nga agpayso, dida pay nakopia ti langit. ta itoy a paset ti ili, este, siudad, gumaygayebgeb nga apuy laengen ti kurangna tapno makuna a dimtengen ti impierno ditoy daga. nakaar-ariwawa ti ariangga dagiti nagduduma a tindera ken agsasabali a tagilako. dumalagudog ti paddak dagiti rineprep nga agdardaras, aglaladut ken uray dagiti din makapaddak a mangikugtakugtar kadagiti agdumadumat’ langana a wara ken rugit kadagiti dalan. makapleng ti banipbip, banapbap ti nagduduma a lugan: pedicab a kamlos, traysi nga agangkit, dyip a karag, taxi/fx a sumsumiag, bisikleta nga agkurad, oner nga agrarrarek, kotse a sumilsilap. tallo oras a sayagen ti lugan a nakapalos iti 120/kph ti sangadangan laeng a papanan – gapu iti trapik. umas-asimbuyok ti naglalaok nga asuk, karaman dagiti paypayubyoben ken sengngaw ti tig-ab dagiti agkaiwara nga unipormado a butete. ti pakabuklan dagiti kalsada: sementado, abot, lubnak. ket broom! splashsss! dios ama, anian a bastos daydiay a bmw. dinak agpayso nadamgis – ta nasigudak ti naglisi – ngem pinuruanna ‘ta lubnak ket naaksidentet’ bado ken rupak iti parsiak ti ingget bangsitna a danumdanum a pitak ken danum a pitakpitak. di man la naglukat ti tawana, linuktan ketdi ‘diay nakalugan daydiay tangguyobna sa tinalmetalmeganna: attn mntal hospi, da nklibas a
psenteyo! 

iv.

ne-ne-ney, agpiestadan sa met ditoy, ta nakaar-ariwawa ken nakaad-adu man ti tao. afuu, daytoy ti kunak kadagiti estimadok nga annakko. ammoda la ngaruden a teggedda man a tegged, manglangandanto pay la a mangan, mapanunotda pay la'ng ti agbarayuboy. dida pay la'ng igatang ti gastuenda nga agpiesta iti sangabukel a sim ta di la ket agan-anus lattan dagiti napitpit a latlata kadagiti bubongan dagiti barongbarongda. ngem agur'kayo, yapay di latta maikkat dagiti soldado ti kinamannakipunsionda? ta addada a presente, binagonda pay! sa apay dagita buldoser? ne-ay ta addada met agiikkisen! ne, 'nia daydiay bra-ta-ta-tatat! piestan sa nga agpayso ta ne, kamanalbuongen! ngem agur'kayo ta plumesingak bassit ditoy likod ti dram (wen, apo, nasakit ti mabaddekan ti angesna) ta, ne, dagiti annakko, kaslada la'ng met nabuak a bunaren nga agi-ikkis nga agtatarayen iti no sadinon a suli! ania, addada naustel? mano? ania, ni kompad kuaning nairaman a narim-it iti uneg ti rinumekda a palasiona? ta apay, uray ket no bullakayanen, dina la ngatan inkarigatan nga inyaddangen dagiti nakapsuten a tumengna nga immadayon iti ammona la ngaruden a marumek a taengna? no gubat, saan a piesta ti napasamak, mano nga'd met ti kasualti a nakapatig? (he-he, apo, landok ti bagi dagita isu nga uray pinangpangen a gemgem ti mangatibelbel, ingget salun-atdanto latta nga agsubli nga agbabartek iti kampoda) ania?!

v.

agurayka man, ubing, itay pay  a  surotka  a  surot   kaniak, a… kalbitka a kalbit… ania, uray lima pisos laeng? aha, agpalpalamaka gayam! ngem di kad’ maiparit ditoy ti agpalimos?
ania, lisensiadoka? naggapuan ti papelesmo? ni kabo (indemotna ni ser, apo – inspector ‘ta kunkunana)? uray pisos lattan no awan lima, apo diosko, kunam? aha, sika man pay lat’
nakalasin kaniak. anghelka nga agpayso ngem pinagrutayrutaynaka ti adu a rigat ti biag ken
adu a pannakabaybay-a. ngem ‘nakko, saan nga agig-iggem ni kristo iti kuarta. ania kad’ ti
pamay-am iti pisos? igatang iti pamedped ‘ta nabayagen nga ing-ingatam a bisin? ket no
madama ti punsion iti dayta a mansion. didaka pastreken? nakkongko, problema a talaga ti
inyasidegmo. kayatko unay  a matulonganka ngem awan  kuartak – madyik la’ng ti adda’t
bulsak. ngem no pagmilagruek ti litson a baka ken sangasiliasi nga innapuy iti sanguanam,
di bumurong nga iti nalaus a ragsakmo – ken pagyamanmo pay ket ngatan – yikkismo iti
sangapilipinasan a nakitam ken pinagmilagruannaka ni kristo. ket atibelbelannaka la ketdi ti rineprep a sarado – ken uray nakalukat – a katoliko. mairadio, maidiario ken maitelebisionka. baka atiwem pay ni judiel iti kinalatak. lua a dara laeng ti nakitana idinto a sangabukel a baka ti basta nanalpaak lattan iti sanguanam. ti pagproblemaak unay, amangan no asitgannakanto ti bakla a talent manager ket mapanunotmo metten ti agartista. dika aglibak, aydolmo ni fpj, ania (apo, kuna ni erap, isu kano ti sumaruno a presidente)? ngem amin a solusion, adda problemana (‘nakkuemon, apo? amin a problema adda solusionna, kunam, a, apo): urayem laeng a malpas ti punsion ken iruruar dagiti pasig a baliena a mannakipunsion. uray kitaem, sumaruno a rummuar dagiti ingget kuttong a katulong a nagawit iti sinako a nagimulsitan dagiti rawet a no manganda kiddisanda laeng ti pidutenda a nagdakkel a tinuno a lapulapu. ania, makauman ti taraon a masuksukainan iti basuraan? ania, bagkatenkan nga ipapilid tapno dardaraska a makasaklang idiay langit  ket agumakan sadiay iti chickenjoy?

vi.
hay’apo, agyamanak ta nakasarakak met laeng iti simbaan. nagunegto la ketdin ti
nangipatakderan ni disipulo pedro. ne, politikon sa metten ni pedring - impanaganna metten ti simbaan (katedral, apo) iti naganna! permi pay a kadadakkel dagiti letra – kasla  agreeleksion. hmmp, baam man! sumrekak ketdi ta maugasan man dagiti dimket kaniak a rugit ken yinana ti bagi nga awan met ti aw-awitenna ngem permi ketdin a dagsenna. ne-ay, makitungtong-it sa met ti ob-obraen dagiti pastor ti arban, ta apay a nagbassit dagitoy nadanonak a karnero? mabalinmo nga iladan dagiti tugaw! ken agurayka, saan sa met a karnero ‘ta adda iti asidegko? anian ti su…otna – anian dagiti barukongna, anian dagiti luppona! hmmp, ti la adda a makitkita! sige, fader, ituloymo ti sermonmo: “respetuenyo koma met ti balay ti dios. no sumrekkayo, ilemmengyo met koma, a,  dagiti ‘agpaparang’ babaen iti panagsuot ti uray saan a disente basta la ketdi saan a mangibuybuyangyang. no kaskay la st queen nga umay makimisa, baka uray no ni kristo ti makatugawyo, tumangken dagiti tumangken!” (paggaak). pordios, ni fader met,
grabe! ne,  kinitanak ni fader, kasla laslasinennak. nakadlaw sa iti iseserrek ni bosing. sige la’ng, fader, ituloymo ti sermonmo: “ken no sumrekkayo iti balayna, appo, a, ket agbuggo ken pumulbokay met koma, a, bassit. saankay met koma nga umay ditoy a kasla kakalkali a kamotit. kangrunaanna, agibarbas ken agpapukiskay met bassit. dikay koma met, a, umay makimisa nga aglanglanga nga ermitanio!”

“apo dios, amak a linibasak idta langit, nagdakkel gayam a kinamaag ti bumaba ditoy daga a di pay nadanon ti naikeddeng nga oras!”
#


ni madaydayaw, ti tuso nga aso

dimtengka iti rutrot a kalapawmi, iti maysa a mayo. kuttongika, ti laeng tianmo ti dakkel, nagdugyotka, ginudgodka, minukatka. ken nangisit ti marismo.

iti pannakasarakko kenka, nakitak  ti  nagpaiduma a kapsutmo. agibar-ibar ti nainayad a pannagnam, kaska la mayang-angin. kasla masaksakitka. wenno pinakapsutnaka laeng ti nakaro a bisin. aglanglangaka ngamin a nabayagen a di nangan. adayota iti kabalbalayan ket mabalin a nayaw-awanka laeng. ngem ad-adda a pinatik nga awan ti taeng a naggapuan ken pagawidam. ta no adda koma akintaraken kenka, saan koma a kasta ti kinakakaasi ti langam.

dika koma piduten iti igid ti nakataptapok ken lasonglasong a kalsada a dandani nakapayatak kenka. ta nakurkurapaykam pay ngem bao. mannalonak nga agpayso ngem diak met kukua ti suksukayek a daga. nailumlom ken mailumlumlomkami iti utang. nganngani diak payen mapakan ti lima nga annakko, mangalaak pay iti maysa manen a palamuten? ammok a no maysakanton nga aso, agkurang ti kusto a kanen ti maysa a tao kenka. ngem kas man la agkarkararag dagiti matam, kas man yun-unnoyda: “naggapuak iti adayo a lugar,saklotennak koma ‘ta panangngaasi ket yawidnak koma, awan ti akinkukua kaniak no di ti makapidut kaniak, nakasaganaak nga agbalin nga adipen ket kas  pagsubalitko, agserbiak  kadakayo a napnuan-puso,ingget kinapudno, ingget sayaat…” nakitak ti langak ken langa ti pamiliak iti langam a nakakaasi unay ket
inubbaka nga inyawid. ken amangan ketdi no sikan ti intinnag ti dios a suerte a nabayagen nga
iparparintumengmi tapno agbaliw koma metten ti nagdagem man a panagbiagmi.

ammomi a manaiyonka laeng a dagsen iti nadagsen a panagbiagmi, ngem siraragsak ti pamiliak a
nangpasangbay kenka. nupay kanayon a nadalus ti kaldero uray di pay naugasan iti panagkurkurangmi iti taraon, karkarna ti aldaw nga isasangbaymo. adda nabati a sangakidkidan nga innapuy iti kaldero, adda bassit nabati a digo ti inabraw a bulong ti marunggay iti nauging a tayab. ket mabisinka a talaga, diak pay nakakirem iti mamitlo, nainnawanen ti nanganam a sabsabut.

napintas ti tiempo ket pinadigoska, sinabonanka iti nasarakak a kasla kuko  ti  ingpisna a mr. clean. insarunok ti napan rimmuros iti bulong ti kawkawwati, tinaltalko, pinespesko ti tubbogna ket insapsapok kadagiti paset ti bagim a  kimmarayaman ti gudgodmo. simmaruno ti panangbuniagko kenka. pinanagananka iti madaydayaw, inadawko ken pakalaglagipak metten ti naganmo kadagiti pinilik nga inton bigat agbalindanton a madaydayaw a tao. saankan a pinanaganan iti marigrigat, kas iti nagan daydi natay a pusami. malas sa ti kasdiay a nagan, saan a makapagbayag ti biagna. daydinto met ngamin marigrigat, iti kanayon ngata a dina pannakakapkapnek a mangan – ta talaga a kanayon nga awan manisnis iti dulangmi kalpasan ti kaan – kinalikagumanna ti napan nakilanglang iti baboy a dakkel ken ingget rawet a taraken
ti kaarruba a mangsabsabsab iti sangakaldero a naginnawan nga innapuy. kagura ngata ti baboy ti adda kalanglangna – nangruna no ‘tay mabisin unay – sinang-abna ni bassit ken ultimot' kuttongna a pusa. napuruan ngata ket rinumek ti natatadem a ngipen ti ulo ni marigrigat. iti dayta met la a kanito, iti abay ti sangakaldero a taraon ti ayup, naidasay ti pusa ni marigrigat. dita a nakitak a siam man ti biag ‘tay bassit a pinarsua, maminsan laeng a kittab ti dakkel ken ingget rawet nga animal ket makusbo agraman ti maikasangapulo a biagna. ket dakkel ti pammatik a din maitulad ti gasatmo iti tungpal ni marigrigat. madaydayaw ti naganmo ket dagiti ammok a madaydayaw, napaut ti biagda – isuda pay ketdi, a, ti pumatpatay. ken pinanagananka iti madaydayaw tapno uray kasta ti langam –  nakakaasi ken nakaar-ariek – addan dagus kakaisuna a maipagpannakkel, maipagtangsitmo: dayta naganmo.

ket nagtultuloy ti panangpadigosmi kenka, iti panangsabonmi kenka iti kasla kuko ti ingpisna a tedda a mr. clean, iti panangsapsapomi iti bagim iti tubbog ti nadekdek a bulong ti kawkawwati. nupay sangasubuan a para tao laeng ti makarkarukayko a taraon, ikarkarigatak nga ibatianka, ibatbatiandaka   dagiti   annakko  iti  kanem. ket  iti   panaglabas  ti aldaw in-inut a simmalun-at ken dimmakkelka agingga a nagbalinka a naan-anay nga aso.

in-inut met a pimmudno ti pammatik nga agbalinkanto a madaydayaw, kas iti ibagbaga ‘ta naganmo. adun ti mangdaydayaw kenka. alla, nagpintasen nga aso, nagkyut! kunkunada. agingga a nagbalinka a naan-anay a madaydayaw. raemennakan dagiti padam nga aso, nangruna dagiti babbabassit ngem sika. pagbutbutngandakan, no saandaka a pagkurnuan, lisian wenno tarayandakan dagiti padam nga aso a makarana ti madi a papangresam. ket adu ti nangipadto nga uray pay aso idi ugma, mapagkurnomto nga aglulua iti sangom.

ngem ti rugi ti panagdakkelmo, timmanor met dagiti parikut a gubuay ti panagbalinmo nga aso.

sinuruandaka a saan a tumakki iti uneg ti kalapaw wenno sadino la ditan iti paraangan. naawatam met. ngem ti ketdin tengnga ti dalan ti pinagbalinmo a kasilias. ti parikut, mabadbaddekan met dagiti aglabas ti nagbangsit a takkim. agrekreklamoda, nangruna dagiti mapan ageskuela wenno umudong idiay ili.

sinuruandaka nga aganup iti billit. nasursuruanka met. ti madi, dimo met yawat iti amom ti
matiliwmo – ta napia la koma nga ituno. apaggammat, karemkemem met a dagus. saan a bale koma ta billit met laeng nga ingget bassit. ngem ti kadaksan, daytay nakalawlawag a manok mapagbiddutam a billit. napitloakon a nakabayad iti nginarusngosmo a manok.

sinuruandaka nga agsiput iti pusa a mangngallong. naalam met. laeng ta alistuam met a meriendaen dagiti masalbarmo a nakallong a sida.

idi agangay, kanayonmon a mapagkamalian a tinuno a lames ti sinelas dagiti kabbalaymo – pagsidsiddaawam la ket ngata no apay nga awan met siit ken ingget kulbet ti lasag dagiti biktimam. no aggatel ken  makatiempoka, pagammuan  ta  umasuk lattan   ni  sinelas   iti  sakaanan  ti  agdan   ket   inton   masarakan, pirsapirsayen ti kararuana!

agingga a dimteng ti aldaw a saan laengen a dagiti padam nga aso ti agkurno kenka. uray payen dagiti tao kabutbutengdakan. saanka met ngaminen a basta mapnek iti panagtaulmo, ad-adda ketdin a paggugustom ti agkamat iti tao. magatgatlanka a mamutbuteng, yad-addam ti makaunget no pangngegandaka iti “salaki!” wenno adda iggemda a burrarawit. ad-adda a malasen ‘tay agpanggep a mangtaray kenka. sa la in-inut nga agnadnad ti panagtaul ken idadarupmo no agtugaw ken sawen ti “madaydayaw, tu-tutu-toy, madaydayaw…” ket in-inut a makaadayo ken maispal iti peggad ti lumabas a tao. ti panagdarasudos nga iseserrek iti kalapawmi, kaipapananna iti panagsebba iti disgrasia. nasken nga ammuen pay nga umuna ti sangaili nga adda sadiay dagiti bumalay a manganawa kenka no saanna a kayat ti madimalas – maibilang kadagiti nakagatmon – sakbay a mabaddekanna ti ruangan ti inaladan.

idi damo, naayatanak iti nakitak a kinauyong ken kinaturedmo. nasayaat met, kunkunak, tapno dinakam basta mastrek ti mannanakaw – uray ammok nga awan ti agpapaus a mangserrek kadakami ta awan met ti matakawda ta kunak ngarud a nakurkurapaykam pay ngem bao.

ngem iti naminsan, sinerreknakami ti mannanakaw. ti nakakaskasdaaw, saanmi a nangngeg ti ngernger ken taulmo idi sumrek ti birkog. napuotanmi laengen iti kabigatanna a napukawankami. awanen ti paksiw a galunggong iti nalipatanmi iti bangkera a tayab – paksiw a nairanta a naitedda a pagkikiddisanmi koma a pammigat. iti bangkera a nakaaramidan ti krimen, nakakitakami iti tugot. ngem saan nga iti tao, linamma ti dapan ti aso!

ngem saan a dayta ti kakaruan a naaramidmo a krimen iti mismo a nangpidut, nangagas, nangpakan ken nangpadakkel kenka.  kinagatmo  ti   buridekko!  daldalusan  ti  manangna  dagiti nakammelko a lames iti talon idi kellaat ti isasang-abmo. ket natiliw dagiti bibigmo ti agkutkuti pay laeng a dalag. maymaysa a dalag ken daydiay ti kadakkelan kadagiti nakammelko. nakita ni buridekko ti inaramidmo  ket  naalistuanna  met  a  naikaw-it  ti  imana iti naikuentas kenka  a  tali iti napartak  nga  ilalabasmo  iti  sangona.  napigsaka ngem dinaka inibbatan ni buridek ket iti nagtipon ngem nagginnuyod a pigsayo, naidaramudomkayo a dua iti daga. masayangan unay ni buridek iti kadakkel ti adda iti ngiwatmo – ita man laengen a makaramankami iti kasdiay kadakkelna a lames – napukaw iti panunotna ti mabalin a maganabna a peggad. pinilit ti maysa nga imana a ginaw-at ti dalag a nakaangkla iti bibigmo. pinadasna a ginamrut. gamrut! ngem… ngarrb! ket naregreg iti daga ti daradara a lames iti ikakali ti natatadem a ngipen iti naganus, nakuttong a takiag…

diak ammo ti agpungtot, ngem nagburek ti darak idi maammuak ti napasamak. sika, madaydayaw, uken a pinidutko, pinadakkel ken pinalamut ti pamilia a kanayon nga awan maisaangna, kasdiay ti inaramidmo? sika, a kabayatan ti panagdakkelmo kumarkaro met ti kinarawetmo, ngem ikarkarigatanmi latta a teddaandaka manipud iti pinggan ti taraon a di pay koma umanay iti akinlatok! nalagipko la ket ngarud ti kasangayko!

ket inasak dagiti buneng. saanak a nadangkok, ngem inton bigat, rambakak ti kasangayko.  isukatko iti arak ti kagudua ti kararuam, ket inton bigat maangay ti kabaknangan a punsion ni marigrigat. ket amin a biktima ti amin nga aso, maawisda ket dumar-ayda ket makipagragsakda a mangraman iti imas ti karne ti maysa a madaydayaw nga aso!#


Sarita da
:  
AURELIO S. AGCAOILI / JAIME M. AGPALO, Jr. / ROY V. ARAGON / FLORENTINO B. LORENZANA 
ARIEL S. TABAG