NELSON G. DALIGCON
sukir
kumpetka iti imak, kuna ti dios:
tapno maawaganka a nagasat
ket madilpatam ti langit.
ditoy, makaduetom dagiti anghel
makaginnarakgakmo dagiti santo
maangotmo ti banglo dagiti santa
makain-innangawmo dagiti tigre ken leon.
ditoy, bussog la ti adda, agtig-ab pati lasag,
awan sakit – agbiagka iti awan patinggana!
ngem dika kimpet:
ket natnagka
iti purgatorio dagiti marigrigat,
iti ania man nga oras agkuripaspaska, maag!
HARING BUILDING
(Daniw ng naiwang anak ng karpinterong nahulog at nabasag ang bungo habang ginagawa ang gusaling binabanggit.)
Nabuo ang higante mong kalansay
Sa binaklas na buto ng aba kong tatay.
At ikaw ay nagsa-katawan
Sa kanyang balat at laman.
Nagkakulay ka’t kuminang ng lubos
Sa pawis niya’t dugong ibinuhos.
At nabuhay ka
Sa nalagot niyang hininga.
Nang tangkaing pasukin ka’t makahingi
Dahil ‘ala talaga akong pambili
At malasahan namang itini-tv mong chicken joy
Ang di-nagpagod na tanod ako’y itinaboy.
Ako’y itinaboy!
batibat
"nalibre ni makitaltalon iti abang,
nakalipat dagiti agsingsingir iti pautang,
di nagundawayan dagiti ling-et.
ket nakargaan ti pagbagasan,
nalanitan ti tian
ket nagpiesta dagiti tig-ab.
naluktan ti pagbaludan
ket rimmuar ti awan basolna,
nabitay ti soldado a mammapatay.
naaprobaran ti papeles
nga idi pay a mapappapirmaan.
kinamat ti trabaho ni tambay
ket nalipatan ti abrod.
nagsardeng ti kimat ken gurruod
ket dagiti ikkis a mapuypuyatan iti kalsada
nakaturogda iti nairut.
iti dayta a panawen, dimteng ti pannakapnek,
simmangbay ti langit kadagiti babassit."
napatangad iti langit ti dios iti kasta unay a yamanna
Ta naputed ti batibat a bunga ti pannakailibayna!
ania ngata
ania ngata no mapasamak daytoy a milagro?
kellaat agbalin a nengneng ti butiog nga asendero
ket ni angkuan a makitaltalon isun addaan ulo.
maysa nga aldaw, iti sangot’ asendero nga agbibiag a sitatalna
basta lattan tumpuar ni angkuan nga armadot’ kakaduana
ket sawenna a ti daga a nagrigrigatan ti asendero kukuana,
patpatalgedan dagiti papel nga ig-iggamanna.
ket babaen bileg a madildilut ni angkuan iti gayyemnan a gobierno
ken pammutbuteng paltog a nakasagana a bumettak ulo,
ti daga a nagrigrigatan matagikuana nga awan adu a sao.
ket ni nakakaasi a don nagbalin a makitaltalon laengen
a mabmabsog adu a pannakagundaway, pannakairurumen
ken iti nakana a kinakurapay mairemremrem.
ania ngata nga agpayso no daytoy a milagro mapasamak
ket sika, sika ti asendero a maag-agapad?
dika ngata mapanunot ti mangidaulo iti gubat?
dika makaturog
dika makaturog kadagiti rabii.
ta di mabusalan ti sipnget
dagiti nagtagigita a karasakas…
kumali’t lapayag
rippiis baddek ti musang
nga umar-arubayan
kadagiti malammin a piek.
makapaseggar dagiti taguob
a makaangot lang-es-dara
dagiti mapidutto a bangkay.
kumittab iti utek
ti ngarusngos dagiti igges
iti nayutangen a bangkag.
naringgor ti urok
ti nabsog nga alimatek.
idinto a kumarasakas
dagiti papeles ti rabii
a mangad-adal
iti yaatiddog ti sipnget!
dika makaturog kadagiti rabii,
uray pay nangwaknit ti langit.
natagari unay dagiti imbitado a bituen
iti panagpiestat’ langit –
kumanabtuog dagiti panagsasala
iti entabladot’ agkuykuyakoy a bulan
a sumimsimsim nalabaga nga arak…
iti sanguanan ti nakadalit a daga!
ay! makapabaringkuas dagiti batibat
a patawid kadagiti nailaksid iti paraiso
ngem iturturayan ti langit!
awan, awan, ti raniag a makita
iti entablado ti naslag a rabii.
awan, awan ti naikari a turog
iti naikeddeng a panaginana!
ket agtultuloy latta dagiti panagpuyat ti utek…
nasken kadi nga isawsaw ti daniw iti dara
tapno mapintaan iti nalabaga ti nangisit latta a bannawag
ket bumtak iti lulonan nakadasay a daga
ti naisangayan, tagiuray nga agsapa
a pakairidepan dagiti idi pay a mapuypuyatan?
umaykayo, ta agpartitayo iti dios
awan ti maparti a manok
kinaritom ti banias dagiti piek.
awan ti malingta nga itlog
kinaremkem ti aso ti pato.
awan ti masagap nga an-anak
linamut amin ti dalag.
awan ti makurimes a birabid
inarusibsib amin ti itik.
awan ti matuno a sabunganay
ingngusangos ti pabo dagiti pinuon ti saba.
awan ti makilnat nga uggot ti kamotit
inarab amin ti kalding.
awan ti killabban
kinallong ti pusa.
awan ti irik iti kamalig
kinutiman amin ti bao.
panawen ti gawat
ket amin nakuttong…
ngem ingget lukmeg daydiay baboy
a nakaubong iti templo!
umay ngarud amin a mabisbisinan,
ta ti kakaisuna a nabati a grasia intayon pagraranudan.
asaen dagiti buneng,
ta agpartitayo iti dios!
apo dios, palubosannak ta umutangak iti biag
apo dios, nagut-ot ‘toy takiag
iti panangkurkurab dagiti antukab
a pagibuybuyatak binaldi a pigsak
a bayadna sangasaangan la a biag.
apo dios, nagsakit dagitoy abagak
a pagag-agdanan dagiti agarapaap
a dumanon langit tapno dios agbalinda
ket maadipen dagiti pangal nga immulianda.
apo dios, kasla masusuat dagiti matak
iti kamumulengleng kadagiti makitkitak:
naglalawa a daga ken talon – ngem awananak,
nagdaeg dagiti mausoleo – ngem rutrot ti pagtaengak.
apo dios, nakaap-apges ‘toy tianko
iti kanayon a di pannakaisaang ti kaldero:
nakisang ngamin bagas a mapidut dagiti nagaget –
adda ti bussog iti pagbagasan dagiti alimatek.
apo dios, kasla mabmabriat ‘toy barukong
iti sasainnek ni balasangko a rinames ti don,
iti an-anug-og ni bumaket no malagipna
daydi inauna a dinawat ti soldado ti biagna.
apo dios, iniggesen dagitoy dapanko
a narunot mukodna iti kasusubli’t munisipio
a mangyar-arungaing kadagiti bassit laeng a dawat:
sangkatipping a pannakataliaw, hustisia a sangkaparsiak.
apo dios, mariknak a nakaro unayen dagiti sakitko
sangsangapug-awanen ti nabatbati pay nga angesko
ngem awan ospital a mangawat, makaawat kaniak
ta awan ngamin maigatangko iti biag.
ngarud, apo dios, palubosannak, palubosannak
ta umutangak, ta umutangak iti biag!
adda, adda santa klaws
(lallay ti obrero nga ama)
adda, nakkong, adda santa klaws.
saan, nakkong, saan a pumanglaw ti santa klaws –
mannakabalin ti bay-onna ket dinto maawanan
iti mansanas, trak-trak, napipintas a bado…
adda, nakkong, adda santa klaws.
saan, nakkong, dinto agliway a sumarungkar –
adda idi rabii a nagipisok agkakapateg a sagut
kadagiti medias a naisab-it tawa dagiti mansion.
adda, nakkong, adda santa klaws.
saan, nakkong, saan a naimut –
nabannog laeng a nakiin-innellek kadagiti anghel ti dios,
nairidep ket din nakadanon iti taengtayo a rutrot.
adda, nakkong, adda santa klaws.
makargaan ti isab-itmo a medias –
yetnag la ketdi ti idi pay a pagparparintumengan a langit
ti maikanatad a bayad dagiti maibuyat a ling-et!
berso a pinalakpakan ti tian
nadaydayaw
ti agbalin
a gasoline boy
ditoy amerika,
ngem iti prinsipal
a matay iti bisin
iti bukodna a pagilian!
berso ti .45
kunak,
siak ti ari!
ngarud, didak sukiren.
diak kayat
ti nausisa a mata,
ti biangot a lapayag,
ti tarabitab a dila,
ti naglateg a gemgem!
amin a di agkurno
kadagiti pagayatak,
pabulsaak iti sensilio
dagiti piman a mabalo!
iti bakrang ti dios
ti pakasarakan iti palasiok!
idi anupen ti dios ni satanas
umanal-al, sumsumged matana
a nagsaludsod kadakami:
awan la ti nakitkita wenno im-immay kadakayo
a pinarsua nga adda ipus ken sarana?
daydiay parsua a pagaayatnat’
makipatpatang kadagiti babassit.
daydiay agsasao’t adipen ken amo.
no agsarita, pasig a pannakairurumen,
pannakagunggundaway ken pannakaibaddek
ti adda iti nagatel a dilana.
daydiay agpatpatang iti inhustisia ken hustisia,
daydiay mangikaskasaba’t panagkaykaysa,
daydiay a mangyik-ikkis iti irurukuas,
daydiay agdandaniw iti pannakasubbot.
daydiay animal a patienen ti dadduma
nga isu ti dios ket dagidiayen ti satanas.
ti dakesna, dina met ngarud mapagbalin
nga innapuy ti linugaw, a karne ti asin.
no makitkitayo man daydiay a sairo,
ipakaammoyo a dagus iti ngato.
no di pay natnag ‘di naikari kadakayo a bagas,
kagudua ti langit ti kakuyognanton a mayawat
basta agbalinkayo laeng a hudas!
idi makapanaw ti dios, pinaruarmi ti sangaili
ket intuloymit’ dimngeg iti sarsaritaenna a kinadakes!
maskot
makunayo la ketdi:
anian a kinasalun-at ni jollibee!
nakaaapal lungpot’ pammagina,
‘diay tianna di um-umpes,
kasla kanayon a masikog –
siguro napno,
di makmaksayan,
agum-uma’t
spaghetti ken chickenjoy!
nangruna la ket ngatan no madlawyo
ti kasla kaawan bibisinanna
ta kanayon a pagkedkedanna
a ramanan ti nagbaknang a sagana
dagiti pasken a dar-ayanna.
ti mangray-aw kadagiti ubbing
ti kangrunaan a pakaringgoranna.
sakrusakruyenna nga isalasala
ti ubing nga agbertdey.
kablaaw a kablaaaw,
happy birthday nga happy birthday!
maay-ayokayo la ketdi:
anian a lamuyot ti kudilna,
nakaay-ayat dagiti matana,
nakais-isem,
payapay a payapay,
makakidikkidik ti bosesna,
katawa a katawa.
dagiti kinni ken lung-ayna –
ray-awenna
ti uray agpaspasugnod nga ubing,
mapaisemna
uray problemado a nataengan…
ngem kalpasan a maipapas
dagiti panagragsak,
kalpasan a mayawat
ti bayad dagiti serbisio
iti pusturado a kahera ti dios,
maituloy ti naputed a pabuya…
mauksot ti maikomkomersio
nga abungot ti ray-aw
ket tumpuar ti nakasalsalun-at
a kinapiman:
nagkuttong a pinarsua,
nadaripespes iti ling-et
ken panagkapsut –
iti pannakaabungot ti bagi
ken kinabantot
ti maar-arkila a maskara,
iti nalaus a bisin
ken kinadagsen
dagiti kararag a di maipangpangag!
naited ti balitok a bayad ti maskara,
ngem ni tao naitantan manen
ti binting a limos kadagiti naidasay a ling-et!
ket leppay latta dagiti panagawid,
kasla maul-ulod dagiti addang
nupay sangasupot la a gotot’ baklay ti abaga –
goto a pangrambak panagkasangay ti buridek
ti ama a di man la makaited iti pakaragsakan
ti pamilia nga agur-uray, naynay nga agur-uray…
angkuan obrero ti naganko, saan a jollibee –
ngem kadagiti ingget baknang a pasken,
siak ti jollibee!
dung-aw ti derby winner
siak ti natadian
siak ti nakidangadang
siak ti nasugatan
siak ti nangikalang.
ngem ti diosko ti napalakpakan,
isu ti bimmaknang!
awan patinggana, isu nga isu, paulit-ulit, a palagip ken ni gagangay nga umili iti siudad ti kinnamatan
lunes.
nasken a bumangonka a masapa
tapno makakamakamka’t anges.
martes.
nasken a bumangonka a masapa
tapno makakamakamka’t anges.
mierkoles.
nasken a bumangonka a masapa
tapno makakamakamka’t anges.
huebes.
nasken a bumangonka a masapa
tapno makakamakamka’t anges.
biernes.
nasken a bumangonka a masapa
tapno makakamakamka’t anges.
sabado.
nasken a bumangonka a masapa
tapno makakamakamka’t anges.
domingo.
nasken a bumangonka a masapa
tapno makakamakamka’t anges.
lunes.
nasken a bumangonka a masapa
tapno makakamakamka’t anges.
martes.
nasken a bumangonka a masapa
tapno makakamakamka’t anges.
mierkoles.
nasken a bumangonka a masapa
tapno makakamakamka’t anges.
huebes.
nasken a bumangonka a masapa
tapno makakamakamka’t anges.
biernes.
nasken a bumangonka a masapa
tapno makakamakamka’t anges.
sabado.
nasken a bumangonka a masapa
tapno makakamakamka’t anges.
domingo.
nasken a bumangonka a masapa
tapno makakamakamka’t anges.
lunes.
nasken a bumangonka a masapa
tapno makakamakamka’t anges.
martes.
nasken a bumangonka a masapa
tapno makakamakamka’t anges.
mierkoles.
nasken a bumangonka a masapa
tapno makakamakamka’t anges.
huebes.
nasken a bumangonka a masapa
tapno makakamakamka’t anges.
biernes.
nasken a bumangonka a masapa
tapno makakamakamka’t anges.
sabado.
nasken a bumangonka a masapa
tapno makakamakamka’t anges.
domingo.
nasken a bumangonka a masapa
tapno makakamakamka’t anges.
lunes.
nasken a bumangonka a masapa
tapno makakamakamka’t anges.
martes.
nasken a bumangonka a masapa
tapno makakamakamka’t anges.
mierkoles.
nasken a bumangonka a masapa
tapno makakamakamka’t anges.
huebes.
nasken a bumangonka a masapa
tapno makakamakamka’t anges.
biernes.
nasken a bumangonka a masapa
tapno makakamakamka’t anges.
sabado.
nasken a bumangonka a masapa
tapno makakamakamka’t anges.
domingo.
nasken a bumangonka a masapa
tapno makakamakamka’t anges!
imbitasion
umaykayo –
sika a mannalon a naagawan sangarakem a daga,
sika nga eskuater a pagkatangkatangen ti demolision,
sika a trabahador nga ipigpigad sadista a pabrika –
dakayo a marigrigat a bekbekkelen dagiti baknang nga usurero,
dakayo a babassit a gunggundawayan dagiti butiog a negosiante.
umaykayo –
sika nga anak ti unionista a pinabaldat’ puraw a kapitalista,
sika a kabsat ti sinalbeyds ti unipormado a paltog,
sika a kasinsin ti naguuttogan anak ken buyot ti mayor –
dakayo a babassit nga ilugesluges dagiti nabileg,
dakayo a marigrigat a maim-imutan iti hustisia.
umaykayo –
sika nga aktibista nga agum-umat’ pang-or ken selda,
sika a botante a mabulbullagaw, mabmabsog baog a kari,
sika nga amat’ ubing a di pay nayanak, naisaldan ti ili –
dakayo a babassit ken marigrigat a sisiumanen ti turay a naturay,
dakayo, amin nga umili a liniputan ti kari dagiti edsa.
umaykayon!
makipagtapogtayo para iti sangataaw a panagkaykaysa
dagiti nauman nga agdildildil iti rugit ti dapan ti sistema
a turayen dagiti nakapsut, babassit, marigrigat nga umili.
napeggad aglangoy ngem nasken a matunton panagbalbaliw
a mangalaw kadagiti karbengannat’ mailung-aw.
umaykayon!
ta inton bigaten ti sangsangkamaysa a pannakaibulos
dagiti naipupok a bagyo kadagiti naingpisen a barukong
a mamagkiwar, mamagungor sangataaw a pannakauma
a mangirukuas rineprep a dalluyon ti rumrumsik a pungtot
a mangduprak, mangilugesluges takdang dagiti dios
ket malmes amin a rugit – ken uray ania pay a palasio!
umaykayon!
tapno itinto panagkulpa ti delubio itoy nga ili
datayto dagiti nagasat a mabati, datayton ti agdir-i:
agbiag! agbiag dagiti gagangay nga umili!
ken ni eman (lacaba)
dika
makaturog
kadagiti rabii
a nasipnget.
dika
mairidep
kadagiti maisangbay
nga agsapa.
ket natayka
iti puyat!
kastoy ti pumatay iti tao
immay kenka a nangimarot’ pigsana iti asim
ket sinepsepmo a sinepsep dagiti ling-etna.
idi agkararag iti nayon ti anges,
inukisam dagiti tumengna.
idi agungap ti bibigna,
binusalam iti granada.
idi aggulagol,
pinutedmo dagiti imana.
ket bimtak ti gurruod iti barukongko ket nakimat ti nakemko
inasitgak ti berdugo:
ung-ong a dios, di kasta’t pumisti iti bassit a tao!
ket ginammatak ingget-kuttong a bagi ti amak
ket ulona imbautko nga awan sinsarita iti pader!
payong
no aggatel dapan nalukmeg a dios,
maukrad dagiti pimmalito a paragpagmo
tapno ti ingget ingpis a bagim
sarapaenna natatadem a gayang ti init
wenno sippawenna dagiti pikat' langit a napagsangit
a naisangrat a kumali kadagiti walay a saka!
ket kas iti sigud, kalpasan dagiti gatel,
sisasalun-at a makaawid ti napagustuan a dios.
ket kas iti sigud, iti iseserrekna iti palasio,
iti ruar, iti suli, awan aniaman nga isab-itnaka –
akingngato dagita saka, aguy-uyaoy ‘ta ulo iti baba!
ti mannubbot
manipud sadi langit immulogka’t daga
ket iti rutrot a kalapaw naipasngay siddaaw:
anaknakat’ dios, ngem magmagnaka a sakasaka?
gayam, naibaonka a saan nga agpasindayaw.
pinakaringgoram ti maulit-ulit a pannakaibunannag kinasiasinom
nupay ammom nga idi pay punganay am-ammon ti naganmo;
impasnekmo nga imbalaybalay awitmo a mision:
immayka a mangispal itoy daga iti inna pannakaikulbo!
iti nagan ‘ta nagan ken iti nagan ti bulsam
kaduam dagiti disipulom, sangsangkamaysakayo
a nagbanniit, nagtabukol, nagdaklis iti mabuniagan:
ti manamati: kristiano, dagiti mayaw-awan: pagano!
apuy a nagkayamkam ti ungor-bagyo a sasaom:
“siak ti silaw ket ti di sumurot, iti apuy a maitikleb”,
“agbiag ti mamati, dagiti sukir agtawid iti lungon!”
ti langit nga idi pay a maur-uray, impintam kadagiti utek.
saan laeng a daniw, nagipakitaka pay iti aramid:
pinagbalinmo nga innapuy ti linugaw, karne ti asin
ti danum, impasangom a makabartek
dagiti pinagmulagat albulario, inka ida binulsek amin.
inaramidmo dagiti tao a simbaan
ket ditat’ nagparparintumengam iti ingget pasnek;
nagpailansaka iti krus iti sanguanan ti kaaduan
ket layus ti namalubos kenka iti inka panagpalangit.
idi addakan pagarian, naguraykami naikari a milagro.
intayamit’ kaldero, ngem apay a darat ti naipisok?
immabaykami’t higante, apay a dikam naital-o?
yan ti pirgis ti langit, apay a kimmarot’ lunod?
ti kaudian a damag: ditoy daga umadani manen yaaymo,
agkaiwaran dagiti pampleto ti pasarabom a langit:
asidegen sangpet tig-ab, panagpadat’ kopita ken pusuelo,
dagiti kinedngan ti ulbod nga ukom, rummuardanton iti bilibid!
ngem kadakkelan a biddut panagsubli a panggepmo:
ta dagiti nasantilmo, naaramiddan maikadua a krusmo;
ti kasabam a maikadua a biag, pudno dayta
ngem maudi daytan nga angesmo no agsublika!
ti dios idi mangngaasi
ni mabisin, inyawatanna
iti payless ken young’s town.
ni masakit, inikkanna
iti biogesic ken revicon.
ni mawaw, inyawatanna
iti pop cola ken wilkins.
ni rutayrutay, inikkanna
iti jockey (brip) ken blue jeans.
ni sakasaka, inyawatanna
iti spartan ken reebok.
ni nalaad, inikkanna
iti rexona ken maxi-peel.
ni labandera, inyawatanna
iti surf ken downy.
ni agdingdingo, inikkanna
iti latigo 50 ken vetracin.
nagipaima pay iti winston ken emperador,
nagited iti extra joss ken diana tuna .
sana impatalastas iti diario, radio ken telebision:
iti parabur nagiwarasak, siak daydiay nagibunong!
sentensia
ket nagdaniw ti dios:
managbasolka!
ta tinarayam tinungro a kataltalonan,
ta dika nagkurno iti pasdek dagiti peste,
ta linibasam dagiti agbitbitla a kristo,
ta dika namati iti adu a kari ti langit!
managbasolka!
ta inidiam agipadawat iti ling-et,
ta dimo naibturan dagiti panaglangan ti kaldero,
ta makitam lattat’ lawag iti likudan ti sipnget,
ta dimo impaima iti ilim ti biag, masakbayam!
managbasolka!
ta inkamangmo dagiti luam sabali a barukong,
ta naglakoka’t ling-et iti tiendaan ti kusto a presio,
ta nagakupka iti takki ken saruat’ sabali
para iti arapaapmo nga ablen a bullalayaw!
managbasolka!
ta insadsadmot’ agsarut a bagi iti dimo pantalan –
bagi a sobsobrat’ alimatek ken kaariek ti malakanyang,
ta panggepmo ti agtakaw iti sabong
a maidaton iti kamposanto nga ilim!
managbasolka!
iti dugyot nga ilim, iti daytoy nadalus a daga,
ta mikrobioka a sakit ti rupa ti dua a pagilian!
ket sika a pugante iti bilibid ti kinakurapay,
awatem ti lamma ti tali – batek kadagiti adbenturero a tengnged!
pasion daydi dios-ti-aluadna a gagangay nga umili
ti progreso imbaddeknak!
ti salaknib dinangrannak!
ti hustisia imbaludnak!
ti langit tinallikudannak!
ti dios sinal-itnak!
saan, saan a makasubalit ti anak ti bassit
saanmo nga inkankanta ngem nangngegak ‘ta ayat
kadagiti panagkiraidmo’t pagbagasan, panagkararag iti asin
ket agtig-abak latta’t dasarmo a linugaw
ta ‘toy tian nasursuronan ti mangawat
kadagiti inaldaw a panagpadispensar ilinglingedmo a lua.
saanmo nga indandaniw panangipategmo kaniak
ngem idi pay a nagkompesarannak ti lakasa:
indulinmot’ dung-awmo kadaydi ama a pinatay dilana
iti panangkarit sangina iti pagang-angsanna a makina
tapno awan taktakmo nga agimaro kadagiti menos-presio a bannog
ket makagatangka’t bussog – nakuttong a bussog!
saanmo nga imbitbitla kadakkel arapaapmo kaniak
ngem insarita kaniak ti sangabukel a kuaderno ken lapis –
laeng, laeng ta kinatawaan matrikula dagiti panagkalikagum:
awan gayam naimprenta a diploma para iti anak adipen ti sabon!
ay! inayat, impateg, dinungdungngonak, inangko…
ngem yetnagmo kadi ‘ta pannakaawat, pammakawan:
awan, awan, diak makasupapak ‘ita kinaimbag!
awan, awan latta’t makaumanay nga igatangko’t agasmo –
sangamalukong la a linugaw magaw-at ling-et nga ibuybuyatko!
ay! diak kayat a makangngegka’t dung- aw – ngem napnon lakasata iti sangit:
ay, inang! awan, inangko, awan lumgak nga init iti langit dagiti babassit!
interogasion
pieknak a sineppeg natadem a kuko
ket imbaltognak nga indisso ti agila
iti presinto ti langit.
nagngernger ti tigre idi maipatugawak iti sango.
nabuisit ti dangaw iti diak isusungbat
ket inisbuannat’ rupak.
diak latta naguni ket ti igges tinakkiannat’ ngiwatko.
natektekan a naguray iti awan a sungbat,
simgiab ti pungtot ket dinarupnak ti leon:
kimmali dagiti sumilsilap a ngipenna iti bakrangko,
ket napno ti nasipnget a siled nasaem nga ungor
ti naidalutaytay a bagi iti naangseg a semento.
impagarup dagiti ayup nga ilalaban pannakarikna’t ut-ot
ket kasla mabisbisinan, dinarupnak sangaarban a berdugo!
kinuraban ti tigre ti tengngedko
sinepsep ti alimatek ti darak
kinaremkem ti buaya dagiti takiagko
inalimon ti yo dagiti gurongko
nginarusngos ti leon ti dalemko
nginutngotan ti pusa ti pusok
sinultop ti agila dagiti matak
sinabsab ti baboy ti takkik
sinikmaw ti dalag dagiti arietko
kinaritom ti banias dagiti butillogko
inarusibsib ti itik ti butok
kinibkiban ti piranha dagiti lasagko
kinaremkem ti aso dagiti tulangko.
ngem nasal-itak a ti kayatda a maammuan dida naammuan –
kas iti diak met pannakaduktal kayatko idi a maduktalan
maipapan kadaydi manong nga inkalit’ adu a ngipen iti kasikalan.
apay koma nga ipudnok
a siak ti pimmisti iti daydiay nakamassayag a dios?
lauya a takiag
sibubukel a takiag nakuttong a mangmangged,
nadiguan ling-et a pespespesen ti pabrika,
nasagpawan sangasab-ok a dadanes
naasinan luat’ annak a pagsangsangiten ni bisin,
natempla iti darat’ nagtagilateg nga unionista.
daytoy ti paggugusto ken inaldaw a sidaek –
siak a dios ti ganansia –
isu a di nakakaskasdaaw
ti kinasalun-at ken kinalukmegko!
ken ni inang a mangsapsapul kaniak
ay! dikan sursoren dagiti kalsada dagiti riaw
ta saanmon a mangngeg pay ti ikkisko sadiay.
ay! dinakon madanon iti barongbarong ni ka angkuan
a dumdumngeg iti pasion mairurrurumen a kaputotan.
ay! dikan mapan iti balay ni patpatgek a kaayan-ayat
ta masabetmo laeng ni pinay a mangsapsapul met kaniak.
ay! dimon kabaelan mangsang-at iti gayyemko a bantay.
ken, inang, awan, awanak met sadiay.
ay! lalo nga awanak kadagiti presinto ken puneraria,
dikan agdamag kadagiti polis, embalsamador ta awan maisungbatda.
ay! bambannogmo no daydiay a simbaan baddekam pay laeng,
ulimek laeng ti sungbat dagiti rebulto iti sapsapulem.
ay! dinakto masarakan, inang, awanto a pulos ti masapulam –
ay! ta dios ti pimmisti kaniak – idi pay naminsan a bulan!
misa
(iti pannakimisa ni gma iti ilimi)
ket napno
ti napangayed a simbaan:
iti leon
iti tigre
iti aso
iti baboy
iti kalding
iti pusa
iti banias
iti alutiit
iti agila
iti wak
iti billit-tuleng
iti buaya
iti yo
iti piranha
iti dalag
iti alimatek
iti antatado
iti dangaw…
ti dios
nakapuesto
iti asideg ti altar
a napintaan iti darat’ karnero.
timmakder ti nakasotana a salaksak
ket nagrikep ti naarkila a templo.
ti misa ekslusibo –
awan napastrek a tao!
edsa 2
naikkat
ti kari.
nasuktan
iti kari.
pakasarakan iti impierno?
manila.
limos ti dios
sinal-it ti pabrika
ti obrero nga amak.
nagputa ti inak
ngem pinisti ti kassit!
ket inamponnak
ti naasi a kalsada.
ngem naranggas
ti sumilsilap a toyota!
idi a nataliawnak ti dios.
ket linimosannak iti lungon
iti sango ti kamera!
malem ti maysa nga obrero
alas singko.
nalpas manen ti nagmalem
a panagibuyat binaldi a ling-et.
mapantan.
agur-urayen ti mawaw a pamiliak
itoy yawidko a sangabaso a danum!
anghel
kalsada ti amak
bangketa ti inak
bingraw ti kaay-ayamko
murkat ti taraonko
ling-et ti pagdigdigosko.
anghelak a natnag iti daga,
sapsapulek ti langit
kadagiti bunton ti basura.
idi simmarungkar ni santo papa
inlemmengnak ti dios ama!
