ARIEL S. TABAG
Pitopulo a biag ti balor ti piso
(Iti lagip dagiti pimmusay iti trahedia iti Ultra, Pebrero 4, 2006)
Lamina daytoy ti panangurkuranges, isaning-i ti host
a kas man imbaddebaddek ti saraaw nga inyeg ti kape
ken noodles ken makalawas a panagpuyat kas nobena
iti gasat a naimaldit iti raffle ticket a testamento
ti pannakaisalda ti nagan iti bullalayaw a nagmaris
iti pirak, balay ken diep. Wen, daytoy ti barometro
ti kinakurapay ti pagilian, isaibbek ti politiko a kailian
a nakipagili kadagiti didiosen, nangbulod iti kudil
dagiti mangurkuranges tapno maitalek kenkuana
dagiti sagbabassit ken nabatbati pay a lua ken ling-et.
Kalpasan ti pannakaisalda dagiti kinelleng ken darepdep
dagiti ubbing tapno saan nga agtunglab ti pirak a napirmaan
iti pangulo, naglilinnetlet, nagdidinnuron, nagbibinnaddek
dagiti naadasan iti namnama a mangalaw iti angesda
nga inkarsel ti tambiolo a nangnutnot met laeng iti maudi
nga ared-ed ti darada. Ket inyalinuno ti garampang nga iniin
ti wawawi-hihihi dagiti asug ken dung-aw a nangdayyeg
iti barukong dagiti away, aplaya ken eskuater: ti umuna,
umuna a makadanon iti panungpalanna. Ibinsabinsa
ti agiwarwarnak ti arte ti ipupusay a simumulagat iti rigat.
Iti pannakapempen dagiti thermos, ulila a sinelas, payong,
ikamen, ules, kamiseta ken bestida, maipasdek ti bullalalayaw
a nakayuritan ti saraaw a kumamang iti kinasin-aw ti law-ang.
Agkaykaysatayo, agparintumeng ti babai a dadaulo;
pagbabadangantayo ti pannakaidalimanek dagiti naidasay
nga arapaap. Kalpasanna, agsisinnublat ti gabinete iti tugaw
a mangraman iti grasia ti piso a pinirmaan ti presidente.
[Immuna a naipablaak iti Bannawag, Pebrero 20, 2006, iti paulo a Pisos ken Pitopulo a Biag; ken iti http://asseng.blogspot.com (ATANG)]
Panagungar Ti Presidente A Nangkusit (Uray) Kadagiti Tagainep
Nasaysayaat laengen ti maidasay ngem iti mapawilan a kumagat
– Maysa a Kuton
Simgar dagiti muldot ket nagsardeng ti pul-oy a mangilallallay iti petalo
Idi pagam-ammuan ta impakdaar ti salaksak ti panagungar ti presidente;
Panagungar iti lagip ta saan met a nagudas ti bagina a pinagimortal ti napalalo
A derrepna iti bileg. Pagungaren dagiti kongresista a nakarian iti kinaimortal met laeng
Manipud iti maisagut kadakuada a binagbagon, kinabkaban, minalmaleta nga anges
Nga inyulog, inyawerda manipud iti kabakiran, kinelleng ken lakasa dagtiti umili.
Urnongen dagitoy a diputado dagiti rurog a naitanem iti agong, mata, lapayag,
Kuko ken ubet ket iragupda kadagiti letra iti utekda a binulodda kadagiti unibersidad,
Sa igamerda iti parsiak ti kimat: sakabanda iti rigis ti bambanti ken pirsay ti ullaw
Ket bulodenda ti siding iti rugit ti nuang. Iturturedda ti apges ti talunasan a mangipas
Kadagiti takiagda; ipirmada ti darada iti mulinaw a puso tapno agbitek a kasla
Sagut met ni Apo Lung-aw, agmaris nalabaga nupay ganggannaet kenkuana ti rikna.
Manipud iti pitak a nakairaramenna, bumangon a kasla nailibay laeng iti siled
Ti Malakaniang; agdiskurso iti pantok ti lubong: kukuak ti palayupoy ken unnoy
Ti dalluyon ken sang-aw dagiti muyong. Lemmesenna iti isbo dagiti bunar; deppesenna
Dagiti ledda ken pan-aw; rumekenna dagiti leddeg ken bennek; samalenna dagiti lames;
Pindangenna dagiti ayup sa idayana iti pannakasangal ti konstitusion dagiti kongresista:
Gunggona ti bilegda a nangigamer iti tallugading ti adobe iti pitak a kas kenkuana.
Kabayatanna, agdung-aw dagiti inna ken maladaga, agunnoyda iti kimat:
Isublim kadin, ala, ti impabulodmo nga alipaga iti kasipngetan a pakaikarianna…
[http://asseng.blogspot.com (ATANG)]
No Agkurno Ti Dara
Agsung-ab ti kararua a maisaklang iti kannag
Kas nguy-at’ saltek nga immagep sabidong a daga
No agkurno ti dara ken lua iti gilap ti pirak.
Kas salungayngay ti lasag a sinigsigpat ti gubat
No ilamina ti malem ti panagsayasay dara,
Agsung-ab ti kararua a maisaklang iti kannag.
Agdung-aw ti sardam a rinames ti rapas a lawag
Kas ibit ti kinelleng nga inkapitolio ti pluma
No agkurno ti dara ken lua iti gilap ti pirak.
Kas bugsot dagiti itta nga intanem ti pitak
No agkaradap kalapati nangilako’t payyakna,
Agsung-ab ti kararua a maisaklang iti kannag.
Agpanes kadit’ bannawag no pumusay gagan-ayan
Kas sangit ti kallupit iti pumpon ti kulintaba
No agkurno ti dara ken lua iti gilap ti pirak?
Ay, agrupsa ti anges nga agkamang iti gukayab,
Kas iti biag a gungtoban gumilgil-ayab a tinta:
Agsung-ab ti kararua a maisaklang iti kannag
No agkurno ti dara ken lua iti gilap ti pirak.
[http://asseng.blogspot.com (ATANG)]
agsulbod ti paltog
agsulbod ti murdong ti paltog iti sabong
kas iti sagibo ti mayo nga anien dagiti ubbing
ti kannag a nangisagawisiw iti talinaay ti kannaway
iti bukot ti nuang. agadiwara ti ayamuom
a mangep-ep ti langsi ken alumiim iti kaunggan
ti siudad ket agtugmokda iti asuk ti kandela
a manginsenso iti nangisit a sikog ti ulep
tapno maipasngay ti danum a mangugas iti sabidong
ti daga.
agsulbod ti sabong iti murdong ti paltog
no iduayyami ti panagibi dagiti riari, kulintaba
ken sardam kadagiti ubbing a putot ti konstitusion
nga uttog. iladawanmi ti dungngo ti gagan-ayan
ket makitada no kasano a pinasgedan dagiti butirog
dagiti matada ken ti panaggil-ayabda a nangsilmut
iti sagumbi a nakaipempenan dagiti arep-ep ti away:
agluada iti dara no mapaneknekanda a berdugoda
iti innada.
agkan ti linnaaw ti sabong a nagsulbod iti murdong
ti paltog ket suknorenna ti kaunggan dagiti ubbing a berdugo
tapno agtalinaay ti dara, kablaawanna ti litania dagiti birhen
a rosario a mayukkor iti padeppa ti abaga ket abrasaenda
ti panangibabaet dagiti imakulada nga eskapular a mayaspili
iti puso, an-anib a mangitunda iti desdes nga agturong
iti sagumbi dagiti sardam a lallayan ti riari ken kulintaba
a panagapon dagiti nuang ken kannaway ken ubbing
ti kannag.
[http://asseng.blogspot.com (ATANG)]
Inplasion Ti Anges
Agapon no kua ti duadua iti alipusposna:
agtalinaed a kas iti panagtaeng dagiti kalio
iti dakulapna.
Tunggal matmatanna ti panangkarit
ti pasdek iti nangisit a langit – agsaniit
ti murdong ti ramay a dinusa ti martilio;
agpalteg ti gurong a ginundawayan ti maso;
agbuangger dagiti takiag ken abaga
a nakigabbo iti semento ken graba.
Iti panagruar-serrek dagiti sumilsilap
a sapatos, kinidemanna idi a tinilmon
ti innapuy a pinananam ti asin
(uray ngamin ti kamatis ken daing
ket impapelen ti kontrata.)
Iti panagtangadna, rugmaan ti alinggaget
ti barukong – ti pannakatnag ti bagi
ket isu ti inplasion dagiti angesda,
naderderen sakbay nga agdisso iti tapok.
Uray no agdung-aw ti tangatang,
saanen a magunggon ti pasdek.
Awitenna dagiti abaga nga agawid,
lam-eken piman ti boksit,
agsasaibbek ti bolsa a pigis.
Amirisenna ti tunggal addang,
makasikkarud ket binting, amangan.
[Immuna a naipablaak iti rimat ken iti http://asseng.blogspot.com (ATANG)]
Libut
Ilibut manen dagiti tumengmi dagiti saem iti abaga
nga impabaklay dagiti rapas ken buli nga ima.
Manon a siglo nga inaradomi dagiti kinelleng
a nagapitanmi iti sangol iti balsaenmi manen
a kaban nga insikog ti bullalayaw dagiti malem
a rinakemmi dagiti ramaymi tapno masagneban
iti nalabaga ti aglulusiaw a dawa? Ay, itugkelmi
latta dagiti kandela a batonlagip dagiti ginamulomi
a ling-et ken lua, agibit iti litania ti saraaw ken
alipaga ti agmatuon a nanguram kadagiti rimat
iti matami. Madepdep ti gil-ayab tunggal perngenmi
dagiti nagsayasay a lua ken dara iti krus. Ngem ania,
aya, ti kinatan-ok iti kiraos? No koma agorasion
ti kampana, yawengna dagiti ikkis iti kaunggan
tapno agpingkida ket ti kimat, gurruodenna
ti matmaturog a langit. Nabayagen a mawaw ti daga
iti panagibi dagiti ulep: inumenda payen dagiti diro
iti barukongmi a nalimogan iti tubbog dagiti dawa,
nateng, prutas a pinespes dagiti bagyo ken igaaw.
Anansata, lua ken dara ti idatonmi iti altar ti katedral.
[http://asseng.blogspot.com (ATANG)]
